Vandag was 'n wonderlike dag

Oppad na my afspraak by 'n Ortopeed vanoggend, het iemand my vreeslik

beledig voor my dogter en oom, en ek vermoed selfs voor sy werkers.  Ek was

baie emosioneel toe ek by die spreekkamer instap en nadat ek myself bekend

gestel het, moes ek eers vir die Ontvangsdame vra waar hulle badkamer is sodat 

ek my emosies onder beheer kon kry.  Sy kon egter sien daars fout want die

trane het oor my wange gestroom, ek kon dit nie keer nie.

Die dr het vrae gevra, en onder andere moes ek vir hom vertel dat ek jare

gelede met Rumatoide Artritis gediagnoseer was, maar het ook bygevoeg dat

ek vir die Rumatoloog duidelik gemaak het dat ek 'n God van wonders dien. 

Die dr het na my x-strale en sonar gekyk wat van my skouers geneem is

en het tot die slotsom gekom dat daar beentjies (in leketaal) is wat skerp

uitstaan (dis blykbaar 'n algemene probleem) en dis wat die vreeslike pyn in

my skouers veroorsaak.  Hy het vir my 'n dubbele dosis kortisoon in elke skouer

gespuit en my gewaarsku dat ek nie vanaand sal slaap nie, omdat dit my

gaan oorstimuleer.  Hoe awesome, nou sit ek hier in die middel van die nag

en ek kan terugdink aan die dag wat verby is, en tot die slotsom kom -

 VANDAG WAS 'N WONDERLIKE DAG

Jy wonder seker nou hoekom ek so sal dink na 'n emosionele ondervinding, 

twee baie seer inspuitings, warmgloede agv die kortisoon, slapeloosheid ens, wat

hierdie dag gekenmerk het?

Daardie Ortopeed het vandag die mooiste woorde geuiter wat ek in 'n

lang tyd gehoor het.  Hy kon GEEN skade as gevolg van Artritis in my

skouers sien nie.  Niks, geen.  Al moes ek deur hierdie pyn gaan om dit

te hoor, was dit alles die moeite werd.  Ek moet oor 'n maand weer gaan vir

inspuitings indien nodig, en as die probleem na drie inspuitings nie opgeklaar

het nie, moet hulle opereer.  Maar ek weet ook dat God alreeds weet wat in die

toekoms is, want Hy is alreeds daar.  Ek glo en vertrou dit sal nie nodig wees nie.

Daarom kyk ek terug na hierdie dag en ek weet God se genade was vir

my genoeg. 

HIERDIE DAG WAS VOORWAAR 'N UITSONDERLIKE WONDERLIKE DAG

THESE BONES WILL SING

HOW GREAT IS OUR GOD

JY MAG MAAR EERLIK WEES...

Soms, of seker altyd in jou lewe, is dit beter om eerlik met jouself te wees.

Ons word tog geleer dat die waarheid jou vry maak, en dis presies net so.

Ek is bevoorreg om 'n blog van 'n jongmeisie te volg wat besig is

'n kosverslawing en die strik van emosionle etery te oorkom.  En iets wat

my werklik diep getref het, was haar eerlikheid en dat sy nie skroom

om presies te vertel wat sy elke dag voel en ervaar. 

happilyeverhealthyy,wordpress.com

Dit het my baie laat dink aan my eie situasie op die oomblik en die feit

dat ek so lanklaas enige iets op my blog gepost het.   Ek was so 

vasgevang in my omstandighede en die alledaagse dinge van die lewe dat 

ek werklik perspektief verloor het.  Vol verskonings.  My omgewing is nie reg nie.

Daars teveel beweging om my, altyd iemand wat oor my skouer kyk, die 

tannie is te nuuskierig en daardie een.......so kan ek aangaan met die

verskonings.  Maar die feit is....ek het opgegee.  Ek wou nie erken dat

ek deur 'n baie moeilike tyd van pyn en nogmaals pyn gegaan het en nog steeds gaan.  Ek kon vir weke nie my arms oplig nie want my skouers het teveel gepyn.  Die vyand het my alledaagse "challenges" gebruik en my fokus totaal afgehaal van die EEN wat my nog altyd deurgedra het.  My oe was nie meer gevestig op Jesus, die begin en die Voleinder van my geloof nie.  

Ek lees tans 'n boek van Dr Caroline Leaf: Maak 'n kopskuif.

Alhoewel sy 'n Wetenskaplike is is al haar navorsing ook geskoei op God se woord.

Onder andere praat sy oor die keuses wat ons maak in ons gedagtes.  En hoe ons gedagtes die verskil tussen lewe en dood vir ons kan beteken in ons liggame.  Jare gelede was dit juis my negatiewe gedagtes wat veroorsaak het dat ek soms nie kon opstaan nie.  Dit het my liggaam vergiftig en groot skade aan my gebeente gemaak,  Die Woord leer ons dat 'n vrolike hart die genesing bevorder, maar 'n verslae gees die gebeente laat uitdroog.  En dis presies wat met my gebeur het. 

 Elke dag is 'n keuse wat ek moet maak om my gedagtes te beheer

Ons het die keuse wat ons met ons gedagtes bedink.  Die Woord is duidelik dat God ons denke kan vernuwe en dat ons selfs elke gedagte gevange kan neem en dit tot gehoorsaamheid kan bring aan Jesus Christus.

God het voor ons die keuse gegee om LEWE of DOOD te kies

Ek wil vandag opnuut weer LEWE kies.  Maak nie saak hoeveel pyn ek op die oomblik ervaar nie, ek weet verseker dat God gister, vandag en tot in alle ewigheid dieselfde is.  

THESE BONES WILL STILL SING

HOW GREAT IS OUR GOD

JEHOVAH RAPHA

GOD OUR HEALER.